ការផ្លាស់ប្តូរទម្លាប់គឺស្មើទៅនឹងផ្លាស់ប្តូរជីវិតរបស់យើង។

ខ្ញុំជឿថាជារៀងរាល់ថ្ងៃ យើងព្យាយាមបង្កើតនៅទម្លាប់ថ្មីៗ ប៉ុន្តែមួយឆ្នាំទៅមួយឆ្នាំហាក់ដូចជាគ្មានអីប្លែកសោះ គ្មានសម្រេចអ្វីប្រសើរជាងមុនសោះ មានអារម្មណ៍នៅតែមិនសប្បាយចិត្ត។

ដូច្នេះ នាងខ្ញុំនឹងបង្ហាញពីអ្វីដែលយើងមើលរំលង។

បងប្អូនត្រូវដឹងថា បង្កើតទម្លាប់ល្អមិនមានតំលៃទេ ប្រសិនបើយើងមិនបោះបង់ទម្លាប់អាក្រក់ ឬក៏យើងហៅថាទម្លាប់ Toxic ជាមុនសិន។

ទម្លាប់ Toxic ១ រឿងតូច ធ្វើដូចរឿងធំ

ការគិតពិចាណារមុននឹងធ្វើការសម្រេចចិត្តទៅលើរឿងអ្វីមួយ គឺជារឿងល្អ។ ប៉ុន្តែនៅពេលដែលយើងនិយាយថា “Overthinking” គឺនៅពេលដែលយើងគិតរឿងមួយ ដែលតូចទេ ប៉ុន្តែបង្កើតវាដូចជារឿងធំ។

ដូចពេលបងប្អូន ចូលហាង អានមីនុយម្ហូប នៅគិតយូរនៅនឹង មីនុយខ្លះមានទាំងរូបម្ហូបទៅទៀត ហើយក៏មិនព្រមសម្រេចថាចង់ញាំអី ឬក៏កម្មង់អី។

ពេលដើរលេងជាមួយអ្នករួមការងារ ឬក៏មិត្តភក្តិ ពួកគាត់សួរថាចង់ទៅណា? គួរទៅណា? យើងតែងឆ្លើយថាអត់ដឹងទេ ចាំគិតមើលសិន។

នៅពេលដែលយើងចំណាយពេលវេលាគិតទៅលើរឿងតូចម្តងហើយម្តងទៀត ពេលនឹងយើងត្រូវសួរខ្លួនឯង ថារឿងនឹង “Worth to Think” អត់។ គួរចំណាយពេលទៅខ្វាយខ្វល់ពីវាអត់។

យើងត្រូវព្យាយាមគ្រប់គ្រងរឿងតូចតាចនៅក្នុងជីវិតយើង កុំឱ្យវារំខានដល់ការសម្រេចចិត្តទៅលើរឿងផ្សេងទៀតដែលសំខាន់ក្នុងជីវិតយើង។

ទម្លាប់ Toxic ២ ឈ្លក់វង្វេងនឹងទស្សនៈរបស់អ្នកដទៃ

ប៉ុន្មានដងនៅក្នុងជីវិតយើង ដែលធ្លាប់បានធ្លាក់ទឹកចិត្តដោយសារមតិរបស់អ្នកដទៃ?

ខ្ញុំប្រាប់ដំណឹងអាក្រក់មួយគឺថាបងប្អូន យើងមិនអាចផ្គាប់ចិត្តមនុស្សគ្រប់គ្នាបានទេ។ រីឯដំណឹងល្អនោះគឺទោះផ្គាប់បាន ឬមិនបាន វាអត់មានអត្ថប្រយោជន៍ក្នុងជីវិតយើងទេ។

ហេតុអីយើងត្រូវខ្ចះខ្ចាយជីវិតយើង ដើម្បីតែរស់ស្របទៅតាមស្តង់ដាររបស់អ្នកដទៃ?

នៅពេល​ដែល​យេីងស្តាប់​មនុស្ស​ជុំវិញ​ខ្លួន​ច្រើន​ពេក​ យេីងភ្លេចថាយេីងខ្លួនឯងចង់បានអី។

ទម្លាប់ Toxic ៣ បន់ឱ្យទៅដល់តែចុងសប្តាហ៍

មនុស្សជាច្រើនខ្ជះខ្ជាយជីវិត និងពេលវេលា រំពឹងឱ្យទៅដល់តែថ្ងៃចុងសប្តាហ៍

នេះគឺជាអន្តាក់មួយ ដែលគ្រោះថ្នាក់មែនទែន​ សម្រាប់អ្នកដែលអត់ចូលចិត្តការងារដែលគាត់ធ្វើ។ គាត់តែងតែចំណាយពេល ពីមួយថ្ងៃទៅមួយថ្ងៃ

ពីមួយអាទិត្យទៅមួយអាទិត្យ បុណ្យឱ្យថ្ងៃសោរ៍ អាទិត្យ ឆាប់មកដល់។

ការពិតទៅ ចុងសប្តាហ៍គឺគ្រាន់តែជាមួយផ្នែកតូចប៉ុណ្ណោះនៃជីវិត។

យើងមិនអាចអត់សប្បាយចិត្តពីច័ន្ទ ដល់សុក្រ រំពឹងថាមានតែចុងសប្តាហ៍ ដែលខ្ញុំនឹងសប្បាយចិត្តទេ។

មួយសប្តាហ៍ពេញ គឺជាពេលវេលាសំខាន់បំផុតសម្រាប់ជីវិតយើង ជាពិសេសគឺថ្ងៃច័ន្ទ។

ថ្ងៃច័ន្ទគឺជាថ្ងៃដែលឱកាសថ្មីៗត្រូវបានបង្កើតឡើងសម្រាប់មួយសប្តាហ៍ពេញ ។

ទម្លាប់ Toxic ៤ ភ័យខ្លាចការផ្លាស់ប្តូរ

តាមការពិតទៅនៅក្នុងជីវិត យើងអត់ចាំបាច់ត្រូវត្រេកអររាល់ការផ្លាស់ប្តូរទេ។

គ្រាន់តែត្រូវទទួលស្គាល់ថា អ្វីៗជំវិញខ្លួនយើងផ្លាស់ប្តូរលឿនមែនទែន ហើយយើងនឹងត្រូវប្រឈមជាមួយបញ្ហាថ្មីៗជារៀងរាល់ថ្ងៃ។

ដូចពេលដែលយើងអត់ពេញចិត្តជាមួយការងារដែលធ្វើរាល់ថ្ងៃ យើងគិតថាបើយើងផ្លាស់ប្តូរការងារទៅធ្វើអ្វីដែលយើងចង់ធ្វើ ប្រាកដជាអត់បានចំណូលថេរដូចរាល់ខែ អត់បានកៅអីអង្គុយស្រួលដូចរាល់ថ្ងៃ អត់មានក្រុមការងារដែលយល់ចិត្តយើងដូចឥឡូវ។

ទោះបីការផ្លាស់ប្តូរនេះដូចរៀងស្រពិចស្រពិលក៏ដោយ ប៉ុន្តែបើយើងចំណាយពេលធ្វើការងារដែលយើងមិនពេញចិត្តទេ​ យើងកំពុងតែខ្ជះខ្ជាយពេលវេលាក្នុងជីវិតរបស់យើងហើយ។

ដូច្នេះអ្នកដែលពូកែសម្របខ្លួន គឺជាមនុស្សដើរផ្លូវបានវែងជាងមនុស្សដែលគេចវេសការផ្លាស់ប្តូរ។

ទម្លាប់ Toxic ៥ រស់នៅក្នុងអតីតកាល

អ្នកណាក៏ដូចអ្នកណា យើងតែងតែគិតពីរឿងដែលកើតមាននៅអតីតកាល កំហុសដែលកើតមាននៅអតីតកាល។

យើងមិនគេចពីការចងចាំបានទេ តែកុំបង្កើតវាជាទម្លាប់ ឱ្យរឿងអាក្រក់ៗនឹងមកគ្របការគិតរបស់យើងជារៀងរាល់ថ្ងៃ។

ឧទាហរណ៍ ទំនាស់គ្រួសារតែងតែកើតមាន ការអាក់អន់ចិត្តជាមួយគ្នាជាដើម។ នៅពេលដែលយើងយករឿងទាំងអស់នឹងមកអង្គុយគិត វាធ្វើឱ្យគ្រួសារអត់មានសុភមង្គលទេ មិនអាចមានភាពសប្បាយរីករាយទេពេលជួបជុំគ្នា។

អ្នកមិនអាចផ្លាស់ប្តូរអ្វីពីអតីតកាលបានទេ ប៉ុន្តែយើងអាចបត់បែនបច្ចុប្បន្នកាលរបស់យើងបាន ហើយអនាគតក៏បានប្រសើរឡើងដូចគ្នា។

ទម្លាប់ Toxic ៦ និយាយបន្ទាបខ្លួនឯង

បងប្អូនស្រមៃមើល ប្រសិនជាយើងមានពួកមាក់ម្នាក់ដើរតាមយើង ២៤ម៉ោង ពេញមួយសប្តាហ៍ ប្រាប់យើងគ្រប់ពេលវេលាថា “អ្នកឯងធាត់ពេកហើយ អ្នកឯងមិនស្អាតទេ អ្នកឯងមិនអាចសម្រេចវាបានទេ។” តើយើងនឹងរីករាយជាមួយមិត្តភក្តិបែបនោះអត់?

ប្រកដណាស់យើងមិនអាចពេញចិត្តទេ។

ប៉ុន្តែមិត្តដែលនៅជាមួយយើងច្រើនជាងគេជាងរៀងរាល់ថ្ងៃនឹង គឺជាយើងផ្ទាល់។

មនុស្សមួយចំនួនពូកែណាស់រឿងបង្អាប់ខ្លួនឯង រហូតដល់បង្កើតចេញជាទម្លាប់។ ឱ្យតែអង្គុយ គឺតូចចិត្តជាមួយខ្លួនឯង។

ដូច្នោះ គួរផ្លាស់ប្តូរ ហើយធ្វើជាមិត្តភក្តិល្អសម្រាប់ខ្លួនឯង។

ជាចុងក្រោយ ទម្លាប់ទាំងប៉ុន្មានខាងលើនេះ គឺពិតជាមិនងាយបោះបង់នោះទេ ប៉ុន្តែនៅពេលដែលអ្នកបោះបង់វាចោល យើងនឹងមានអារម្មណ៍ធូរស្បើយ និងមានថាមពលបន្ថែមទៀតនៅក្នុងជីវិតប្រចាំថ្ងៃរបស់យើង។