កម្មវិធីបើកសន្និបាតបូកសរុបលទ្ធផលការងារប្រចាំឆ្នាំ និងខួបអនុស្សាវរីយ៍ឆ្នាំទី១០ នៃសមាគមសហគ្រិនស្រ្តីកម្ពុជា កាលពីរសៀលថ្ងៃ​ព្រហស្បតិ៍​ ទី៣១ ខែមីនា ឆ្នាំ២០២២​ ក្រោ​មអធិបតី​ភាព​ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចនារី។

លោកជំទាវកិត្តិបណ្ឌិត បានចូលរួមអបអរសាទរ និងកោតសរសើរចំពោះការខិតខំប្រឹងប្រែង និងលះបង់របស់ក្រុមប្រឹក្សាភិបាល និងសមាជិកទាំងអស់ ដែលនាំឱ្យសមាគមទទួលបានលទ្ធផលការងារ​ជាទី​មោទនៈ​ ជាពិសេស ក្រសួងកិច្ចការនារីក៏កំពុងផ្លាស់ប្តូរយុទ្ធសាស្រ្ត និងវិធីសាស្រ្តជាច្រើន ក្នុងការយកចិត្តទុកដាក់ និងគាំទ្រសហគ្រិនស្រ្តីប្រកបដោយភាពច្នៃប្រឌិត និងនវានុវត្តន៍ ស្របតាមសេដ្ឋកិច្ចឌីជីថល។

នាយិកាក្រុមហ៊ុន ធី អេស ឌី ជាសមាជិកក្រុមប្រឹក្សាភិបាលអណ្ណត្តិទី ៤ (២០២១-២០២៤) និងជាប្រធានគណ:កម្មការផ្សព្វផ្សាយ និងទំនាក់ទំនងសាធារណ: បានចូលរួមជាភ្ញៀវកិត្តិយស និងទទួលបានការសាទរពីលោកជំទាវរដ្ឋមន្រ្តី ក្នុងឱកាសនោះផងដែរ។

​រយៈ​កាល​កន្លង​មក​ សមាគមបានរៀបចំស្រាវជ្រាវជាសៀវភៅស (White Paper) ទី១ ទី២ និងទី៣ អំពីតម្រូវការ និងបញ្ហាប្រឈមរបស់សហគ្រិនភាពស្ត្រី ដែលជាទុន និងជាធាតុចូលដល់ការរៀបចំវិធានការគោលនយោបាយ ដើម្បីដោះស្រាយបញ្ហាប្រឈមរបស់សហគ្រិនជាស្រ្តី។ សមាគម​សហគ្រិន​ស្ត្រី​កម្ពុជា​ នឹង​បន្ត​បេសកកម្ម​ ចូល​រួម​អភិវឌ្ឍ​​ និង​លេីក​តម្កើង​ធន​ធាន​ស្ត្រី​ និងសមភាព​យេនឌ័រ​។

គួររំលឹកផងដែរថា សមាគមសហគ្រិនស្រ្តីកម្ពុជាត្រូវបានបង្កើតជាផ្លូវការ នៅឆ្នាំ២០១២ ដោយមានការផ្តួចផ្តើម ដោយលោកជំទាវកិត្តិបណ្ឌិតរដ្ឋមន្រ្តី ក្រសួងកិច្ចការនារី និងការចូលរួមគាំទ្រពីឯកឧត្តម សុក ស៊ីផាន់ណា និងលោកស្រី លីលី សម្បត្តិ។