តើអ្វីជាគោលដៅជីវិតរបស់ខ្ញុំ? នេះជាសំនួរដែលខ្ញុំសួរខ្លួនឯង និងឆ្លើយខ្លួនឯងជារៀងរាល់ព្រឹក ពេលខ្ញុំភ្ញាក់ពីគេង។ ព្រោះវាធ្វើអោយខ្ញុំកាន់តែដឹងច្បាស់នូវហេតុផលសកម្មភាពដែលខ្ញុំកំពុងធ្វើ និងនឹងត្រូវធ្វើជារៀងរាល់ថ្ងៃ។​​ ហេតុផលដែលធ្វើអោយខ្ញុំកាន់ជឿជាក់យ៉ាងច្បាស់ថាក្តីស្រមៃរបស់ខ្ញុំនឹងក្លាយជាការពិត។ ខ្ញុំនឹងអាចប្រើប្រាស់ពេលវេលាបច្ចុប្បន្នរបស់ខ្ញុំមានប្រសិទ្ធភាពជាងមុន នៅពេលដែលខ្ញុំបានស្គាល់នូវគោលដៅខ្លួនឯងច្បាស់។ នៅចុងក្រោយបង្អស់នៃអត្ថបទនេះ ខ្ញុំនឹងប្រាប់មិត្តអ្នកអានថា តើពាក្យ “គោលដៅជីវិត” សម្រាប់ខ្ញុំវាមានអត្ថន័យយ៉ាងដូចម្តេច?

មុននឹងខ្ញុំ ប្រាប់ទៅមិត្តអ្នកអានទាំងអស់ ខ្ញុំសូមជូនជាយុទ្ធសាស្ត្រក្នុងការរៀបគោលដៅជីវិតដែលខ្ញុំបានដកស្រង់ពីសៀវភៅដ៏ល្បីមួយគឺ “ទំលាប់ដ៏មានប្រសិទ្ធិភាពទាំង 7 របស់មនុស្សជោគជ័យ” និពន្ធដោយស្ទីវហ្វិន ខូវ៉េយ (The 7 Habits of Effective People -by Stephen Covey) ដើម្បីមិត្តអ្នកអានក៏អាចស្វែងរកនូវអត្ថន័យ នៃពាក្យមួយនេះសម្រាប់ខ្លួនឯងដែរ។

អ្នកអាចឆ្លើយបានទេថា៖ តើអ្នកគួរធ្វើអ្វី ក្នុងពេលនេះ? ក្នុងថ្ងៃនេះ? គោលដៅជីវិតអ្នកចង់ក្លាយជាអ្វី? អ្នកបានកំណត់ទិសហើយឬនៅ សម្រាប់គោលដៅរយៈពេលវែង? តើអ្នកចាប់ផ្តើមបង្រួមគោលដៅរយៈពេលវែងនោះឲ្យក្លាយជា សកម្មភាពប្រចាំឆ្នាំ ប្រចាំខែ ប្រចាំអាទិត្យ និងប្រចាំថ្ងៃហើយឬនៅ?​ បើចម្លើយថា “ទេ…!” នេះជាការបកស្រាយសាមញ្ញៗ អំពីជំហានទាំងបី ដើម្បីឲ្យអ្នកស្វែងរកអត្ថន័យគោលដៅជីវិតរបស់អ្នក។

ជំហានទី ១៖ ស្វែងរកចំណងចំណូលចិត្ត

ការកំណត់គោលដៅដែលជាចំណងចំណូលចិត្ត គឺមិនមែនគោលដៅដែលជាលុយ, ឡានទំនើប, ផ្ទះធំ, មុខមាត់ ឬយសសក្តិនោះទេ។ គោលដៅជីវិតដែលជាចំណងចំណូលចិត្តរបស់អ្នកគឺជាអ្វីដែលអ្នកចង់បានបំផុតក្នុងមួយឆាកជីវិត ហើយដែលវាជា ដុំងងើបភ្លើង ដុតបញ្ឆេះបង្កើតជាថាមពល ចេញពីក្នុងខ្លួនរបស់អ្នកដើម្បីបង្កើតចេញជាសកម្មភាពជាប្រចាំថ្ងៃរបស់អ្នកនេះឯង។ ខ្ញុំជឿជាក់ថាអ្នកក៏ធ្លាប់សង្កេតឃើញដូចខ្ញុំដែរ ចំពោះអ្នកដែលគ្មានគោលដៅ ភាគច្រើនអ្នកអាចសង្កេតបានតាមរយៈ ពួកគាត់ភាគច្រើនគ្មានសកម្មភាពច្រើនជាប្រចាំថ្ងៃនោះទេ, ពួកគាត់គេងច្រើន, ឧស្សាហ៍ជួបជុំផឹកស៊ីជាមួយមិត្តភក្តិ, ហើយមិនខ្វាវខ្វល់ធ្វើការអ្វីទាំងអស់។ ព្រោះពួកគាត់គ្មានងងើបភ្លើងដែលដុតបញ្ឆេះចេញជាថាមពលបង្កើតសកម្មភាពប្រចាំថ្ងៃនោះឯង។

ជំហានទី ២៖ រៀបចំបេសកកម្មជីវិត

មាន​មនុស្ស​មិនតិច​ទេ ដែលមាន​ក្តី​ស្រមៃ​ជាច្រើន​ថា ខ្លួន​ចង់​សម្រេចបាន​នេះ ចង់​សម្រេចបាន​នោះ តែ​ក្តី​ស្រមៃ ឬអ្វី​ដែល​ពួកគេ​ចង់​សម្រេចបាន​នៅក្នុង​ជីវិត​នោះ តែភាគច្រើននៃក្តីស្រមៃនោះ ឬស្ទើរតែទាំងអស់គឺ​គ្មានមួយណា​ទទួលបាន​ជោគជ័យ​ឡើយ ពីព្រោះ​ពួកគេ​មិនបាន​កំណត់​គោលដៅ​មួយណា​ឲ្យ​បានជា​ក់លាក់ មិនបាន​រៀបចំ​ផែនការ​យុទ្ធសាស្ត្រ ឬរបៀបធ្វើសកម្មភាពគោលដៅនោះឲ្យមានប្រសិទ្ធភាពឡើយ។ ការកំណត់បេសកកម្មជីវិតរបស់អ្នក វាដើរតួនាទីជាផែនទី និងត្រីវិស័យចង្អុលទិសអ្នក គ្រប់ពេលអ្នកត្រូវសំរេចចិត្ត ធ្វើសកម្មភាពអ្វីមួយក្នុងជីវិត។

ជំហានទី ៣៖ កំណត់អាទិភាពសកម្មភាព

ការឲ្យអាទិភាពទៅលើសកម្មភាព និងការងារណាដែលត្រូវជាមួយចំណងចំណូលចិត្ត និងគោលដៅដែលអ្នកចង់បាន គឺជាការសំខាន់។ ព្រោះបើអ្នកដើម្បី​រៀបចំ​ផែនការ​បានល្អ អ្នក​ត្រូវ​គិតថា​សកម្មភាព​ណា​គួរ​ធ្វើ​មុន​ និងសកម្មភាពណាគួរធ្វើ​ក្រោយ ហើយ​ត្រូវ​សួរ​ខ្លួនឯង​ថា តើ​រយៈពេល១ឆ្នាំ​អាច​សម្រេចបាន​អ្វីខ្លះ? រយៈពេល២ឆ្នាំ និង៣ឆ្នាំ​ទៀត អាច​សម្រេចបាន​អ្វីខ្លះ​ទៀត? ការធ្វើសកម្មភាពច្របូកច្របល់ ឬមិនមាន​កំណត់ អាទិភាព និងកាលបរិច្ឆេទច្បាស់លាស់ វាជាមូលហេតុធ្វើឲ្យអ្នកមិនអាចសម្រេចលទ្ធផលអ្វីបានជាដុំកំភួនឡើយ។ ផ្ទុយ​មកវិញ មនុស្ស​ដែល​បានរៀបចំ​ផែនការ​សកម្មភាព​ប្រចាំថ្ងៃ ចេះកំណត់អាទិភាពសកម្មភាពទាំងនោះ មាន​គោលជំហរច្បាស់លាស់​លើ​ខ្លួនឯង​ គឺជា​មនុស្ស​ដែល​ឆាប់​ទទួលបានលទ្ធផលជោគជ័យ​នៅក្នុង​ជីវិត​។

លោកស្រី Helen Keller ជាអ្នកសរសេរសៀវភៅ​ និងជាជនពិការភ្នែក និងថ្លង់ទីមួយដែលបញ្ចប់បរិញ្ញាបត្រផ្នែកវិចិត្រសិល្បៈដំបូងគេលើពិភពលោកនិយាយថា៖

“រឿងដែលអាក្រក់បំផុតជាងខ្វាក់និងថ្លង់ទៀតនោះគឺ អ្នកមានភ្នែកអាចមើលឃើញតែគ្មានចក្ខុវិស័យ។”

សម្រាប់ខ្ញុំ ពាក្យថា “គោលដៅជីវិត”

គឺជាដុំងងើបភ្លើងដ៏សែនក្តៅ ដែលដុតបញ្ឆេះបង្កើតជាថាមពលក្នុងខ្លួនរបស់ខ្ញុំ ឲ្យខ្ញុំធ្វើសកម្មភាព ជាប្រចាំថ្ងៃ មិនខ្លាចភាពហត់នឿយ។ ដែលដុំងងើបភ្លើងនោះវាជំរុញទឹកចិត្តខ្ញុំ ឲ្យក្រោកឈរបន្តជំនះគ្រប់ឧបសគ្គទោះបីខ្ញុំជួបនូវភាពបរាជ័យក៏ដោយ។ គោលដៅជីវិតនោះ វាគឺជាហេតុផលគ្រប់យ៉ាងដែលធ្វើឲ្យខ្ញុំ ឆ្លើយនឹងសំនួរគ្រប់យ៉ាង រាល់ពេលខ្ញុំចាប់ផ្តើមធ្វើសកម្មភាពដើម្បីសម្រេចនូវគោលដៅនោះ។ វាជាអ្នកប្រឆាំងដាច់អហំការ រាល់សកម្មភាពទាំងឡាយណាដែលគ្មានប្រយោជន៏ គ្មានលទ្ធផលជាវិជ្ជមានដល់ការសម្រេចគោលដៅរបស់ខ្ញុំ។ វាជាអ្នកដាស់តឿនដល់ខ្ញុំគ្រប់ពេលដែលខ្ញុំបរាជ័យថា “ការខិតខំប្រឹងប្រែងមិនអាចធានានូវភាពជោគជ័យបាននោះទេ។ តែភាពខ្ចិលច្រអូសគឺធានាបាននូវភាពបរាជ័យ ១០០%។”

ចុះអ្នកវិញ? តើគោលដៅជីវិតអ្នក មានអត្ថន័យយ៉ាងដូចម្តេចសម្រាប់អ្នក?

ដោយក្តីគោរពរាប់អានពីខ្ញុំ,

ស៊ិន ស៊ីហម៉ានិត